ដោយ៖ ឧត្តរ
ឧត្តរមានជ័យ៖ ឯកឧត្តមមាន ចាន់យ៉ាដា អភិបាលខេត្តឧត្តរមានជ័យ បានកោតសរសើរយ៉ាងខ្ពង់ខ្ពស់ចំពោះស្មារតីសាមគ្គីភាព និងការចូលរួមរួមគ្នារបស់បងប្អូនប្រជាការពារភូមិ ផ្អាវ ឃុំផ្អាវ ស្រុកត្រពាំងប្រាសាទ ដែលបានប្រើកម្លាំងផ្ទាល់ដៃក្នុងការកសាងស្ពានឈើមួយមានប្រវែងលើសពី៥០ម៉ែត្រ សម្រាប់បម្រើផលប្រយោជន៍រួមរបស់សហគមន៍។
ឯកឧត្តមបន្តថា ស្ពានឈើមួយកន្លែងនេះ គឺជាស្នាដៃដ៏អស្ចារ្យមួយ ដែលបង្ហាញឱ្យឃើញពីការចេះសហការគ្នា និងការឧស្សាហ៍ព្យាយាមរបស់បងប្អូនប្រជាជនក្នុងការចូលរួមអភិវឌ្ឍន៍ការរស់នៅរបស់ខ្លួន។ វាជាផ្នែកមួយដ៏សំខាន់ក្នុងការលើកស្ទួយគុណភាពជីវិត និងបង្កើនការរីកចម្រើនសម្រាប់សហគមន៍ជាតិទាំងមូល។
ឯកឧត្តមបានបញ្ជាក់ថា សកម្មភាពរបស់បងប្អូនប្រជាការពារភូមិផ្អាវនេះ គឺជាភូមិគំរូល្អមួយសម្រាប់សហគមន៍ផ្សេងទៀតទូទាំងខេត្ត ហើយការចូលរួមយ៉ាងសកម្មរបស់ប្រជាជនជាធាតុសំខាន់ក្នុងការជំរុញការអភិវឌ្ឍ៕
